Dem boys seh…Donald shaft Ramjattan, and got plank fuh Granger

kaiteurnews.com
Donald is either a scamp or becoming one. He thick, thick wid de Granger now. Dem meet Monday fuh talk bout de anti-money laundering Bill. De two of dem couldn’t agree fuh more than a year but after couple minutes Monday dem start behaving like sooroo and dooroo.
But dem boys seh that Granger gun learn. Leh he fall fuh sweet talk; is a trap he putting he self in.  And Ramjattan know that to he heart. Is de same thing Donald do wid Ramjattan. He call Ramjattan three time telling he how de country gun shut down.
He even promise that he gun sign de Procurement Commission. Ramjattan tell he don’t promise, just sign. Up to now Ramjattan still waiting. Since then, Ramjattan seh he can’t fall fuh no more sweet talk. He seh he learn he lesson from de stadium.
Dem call he fuh go and watch de cricket match and dem put he in de Presidential box wid Donald.  Donald give he Scotch and every cutters you could think about.  After two hour, Ramjattan head start spin and he tongue get heavy.
When Donald hear he stuttering he throw he hand round Ramjattan and seh to heself, “I got he hay.” So said, so done. Is people who been close by hear when he whisper to Ramjattan, “Boy leh we close this Amaila deal, nah man.
“Khem, me and you spend all a-wee life in de Pee Pee Pee.” Next two days, Ramjattan vote fuh Amaila. When he hear de falls dry up he tun and tell dem boys at de Waterfalls paper that he nah vote, that he only put up he hand in Parliament.
Granger got to watch he self. He got to decide if he gun put up he hand or he foot fuh Donald in Parliament, or he gun sign a deal fuh get de same thing wha Ramjattan get.
One of dem Bees seh that both Ramjattan and Granger got to know de difference between theoretically and reality. He seh that he learn dem two words since he li’l. He teacher did give he dem two words fuh homework and he ask he father.
De father tell he fuh go and ask he Mooma if she would sleep wid Denzil Washington fuh US$10 million. He run back and tell he Daady that she seh ‘yes, sure’.
He Daady send he fuh ask he sister if she gun sleep wid Denzil fuh US$10 million. De man run back and tell he Daady that he sister seh, “Yes, yes, yes.”
De daady then tell he to go and ask you brother de same question. De Bee run back and he blowing short. “He seh yes, Daady, yes.”
De daady now seh there you go. You have de answer right there.  Theoretically, we are sitting on a potential US$30 million. In reality we are living with three whores.

hahhhhaaaaa. this is hilarious ;D ;D ;D