Dem boys seh…Donald wining like Jagdeo

Guyana is a great country. One year after he come into office and before he eye get big, Jagdeo spend $132 million fuh buy a system fuh do accounting.
That was durra durra money in dem days. It could buy equipment fuh count every species in Guyana. De money wha it end up counting is small change compared to wha de thing can really do.
Dem boys seh that when dem buy de system, it had to be that Jagdeo do it wid good intention. But when somebody realize that de thing gun cut up runnings dem hire people and train dem only fuh count wha collect and not de part of spending.
It got to be that somebody don’t want de nation to see wha dem does do wid all de money dem collect.
Without dem two feature that dem nah train nobody fuh operate, people can’t see who hand, who mouth, who pocket de taxpayer dollars going in.
And Jagdeo who was de Finance Minister and President sit down and watch all this happening and he ain’t seh nutten. He come out and he ain’t tell Donald that he ain’t put dem two features in  place. No wonder Donald can’t smell nutten, feel nutten, hear nutten and see nutten.
But another government idiot tell dem boys that de system wukking perfect. Dem boys ask he how de freak a four-wheel car can drive perfect pun three wheel.
That is when he seh that he ain’t know much bout IFMAS and who mass and who does tek mass. Dem boys finding out that Donald start fuh hide. He behaving like Jagdeo. Any time dem boys talk bout de scampish ways Jagdeo use to run and hide fuh a few weeks till de story die down.
Donald start doing de same thing. Dem boys find that strange again. He use to be a man that dem boys know that would seh fix that damn thing right away. Now he silent.
Dem boys wonder why.
Talk half and tickle Donald fuh mek he wine, not at Sleep out.
FIRST PUBLISHED IN KAITEUR NEWS